Скандальная гісторыя атрымала незразумелы разварот.

3 лютага. Магілёў. Саша Мінько / фота аўтара

Увага! Пры выкарыстанні або перадруку дадзенага матэрыялу ў іншых Інтэрнэт-крыніцах, узгадка сайта MSPRING.ONLINE з гіперспасылкай на арыгінальны тэкст абавязкова ў першым абзацы!


Канфлікт на вуліцы Заслонава ў Магілёве доўжыўся больш за пяць гадоў. Жыхары дома №29 паўстагоддзя таму атрымалі тут жылыя кватэры – так было пазначана ў ардэрах, а ў 2002 годзе дзяржава аб’явіла стары барак, пабудаваны адразу пасля вайны, інтэрнатам. Жыхарам пра гэта не паведамілі, але пяць гадоў таму іх вырашылі выселіць, ня даўшы ніякага жылля. У роспачы яны звярнуліся па дапамогу да журналістаў і праваабаронцаў. У выніку, праз суд грамадзяне дамагаліся хаця б пакоя ў інтэрнаце.

Каму патрэбна рабіць з некаторых магілёўцаў бамжоў?

Дом, як і пяць іншых баракаў побач з ім, павінен быў пайсці пад знос – тут планавалася будаўніцтва вялікай эстакады праз чыгунку, якая будзе весці ў мікрараён “Спадарожнік”.

У красавіку 2017 года начальнік упраўлення архітэктуры і горадабудаўніцтва Магілёўскага гарвыканкама, галоўны архітэктар Уладзімір Скачак папярэджваў: новая артэрыя будзе пракладзена ад плошчы Касманаўтаў праз вуліцу Заслонава і чыгуначныя шляхі да Мінскай шашы.

Паводле задумы архітэктараў, вуліца-дублёр Мінскай шашы будзе весці да Трыумфальнай арцы на выездзе з горада, і гэта будзе чатырохпалосную сямікіламетровая бетонная магістраль.

Сёння стары дом, у якім некаторыя яго насельнікі пражылі ўсё сваё жыццё, пазабіваны дошкамі і паволі прыходзіць у заняпад:

На мінулым тыдні сацсеткі абляцела навіна – пачаліся падрыхтоўчыя працы на тэрыторыі, дзе плануецца дарога-дублёр вуліц Якубоўскага-Загарадная шаша (у народзе – Мінская шаша) у Магілёве. Пад падрыхтоўчымі работамі маецца на ўвазе знос будынкаў. Інфармацыя знайшла пацверджанне ў СМІ. Былі нават апублікаваныя фота.

mogilevnews.by

Аднак будынкі на фота зусім не падобныя на старыя двухпавярховыя баракі. Зносяць прамысловыя цэхі.

Тлумачэнне ўдалося адшукаць у апісанні праекта новай дарогі. На тэрыторыі будаўніцтва знаходзяцца прамысловыя, сацыяльныя і жылыя аб’екты. У першую чаргу будуць знесены ААТ «Магілёўскі домабудаўнічы камбінат», аб’екты ў межах тэрыторыі ААТ «Белэлектрамантаж» і «Рэмсэрвіс», будынкі жылой забудовы.

Але чамусьці вуліца Заслонава ў гэтым пераліку не пазначаная. Інакш кажучы, калі пачаліся рэальныя будаўнічыя работы, аказалася, што вуліца, увогуле, і не патрэбна. У будучыні тут будзе перыфірыйная дарога, а не магістраль.

Карэспандэнт часопіса аб правах чалавека MSPRING.ONLINE вырашыў наведаць гэты стары раён і быў здзіўлены некаторымі метамарфозамі. Напрыклад, возьмем суседні барак па адрасе Заслонава, 27.

Якое ж было наша здзіўленне, калі мы даведаліся, што ў ліпені месяцы мінулага года ў гэтым будынку адкрыўся першы ў Магілёве хостэл на 40 чалавек (на другім паверсе). Акрамя таго, на першым паверсе тут размясцілася цырульня, а частка памяшканняў здаецца ў арэнду. Будынак адрамантаваны і выглядае, па мясцовых мерках, нядрэнна. Ні пра якую трасу тут не ведаюць.

Пра тое, што ўсю вуліцу Заслонава трэба будзе зносіць – а чуткі такія хадзілі даўно, – першымі ўсумніліся працоўныя адной з будаўнічых фірм. Справа ў тым, што гэта тупіковая вуліца, якая сканчаецца трохпавярховым будынкам з крамай.

Калі рассяліць па інтэрнатах няшчасных жыхароў барака атрымалася, то некаторыя шматкватэрныя дамы бюджэце горада не па кішэні. Меркавалася, што на месцы гэтай крамы і суседніх дамоў (№28, №29, №30 па вул. Заслонава) павінна была быць праезная частка, якая вядзе да кальца плошчы Касманаўтаў.

Цяпер жа стала зразумела, што на самой справе трасу вырашана пракласці ў баку ад жылога сектара. Пакуль што дэмантуюць будынкі, якія служылі адміністрацыйнымі памяшканнямі.

Вось тут калісьці была ці то аўтабаза, ці то невялікі склад, а апошнія гады будынак здаваўся пад офісы камерцыйным прадпрыемствам. Праз паўгады тут будзе роўнае месца і пачнуць заліванне бетону.

На кампенсацыйныя выплаты грамадзянам і юрыдычным асобам з бюджэту выдзелена каля 3,8 мільёнаў даляраў. Выселеным з бараку па вуліцы Заслонава не перапала з гэтай сумы нічога. Улічваючы, што цяпер узмоцнена руйнуецца ДСК, грошы пойдуць гэтаму прадпрыемству. Ну і дзесьці мільён долараў сыдзе на кампенсацыю за знесеныя гаражы ў раёне абласной бальніцы – іх каля тысячы.

А зараз – самае цікавае. Мы павялічылі фрагмент схемы аб’екта да чытэльнага маштабу. Высвятляецца, што вуліца Заслонава і пры праектаванні новай трасе не была патрэбная. Для зручнасці мы яе прачарцілі жоўтым колерам – справа яна пазначаная практычна некранутай. Мяркуецца проста падоўжыць вуліцу Будаўнікоў да выезду на магістраль, якая пройдзе метрах у ста ад скрыжавання з Заслонава.

Атрымліваецца, людзей выселілі, дом забілі, а цяпер стары барак будзе толькі гадамі псаваць пейзаж. Як, дарэчы, і астатнія прызнаныя аварыйнымі будынкі.