У Магілёве больш за сотню чалавек падпісаліся пад наказам дэлегатам Усебеларускага сходу

Яны патрабуюць, каб на сходзе ўзнялі пытанне пра аднаўленне будаўніцтва корпуса БРУ.

20 чэрвеня. Магілёў. Алесь Святліцкі


Гарадскі актывіст Аляксей Паўлоўскі сабраў 123 подпісы пад калектыўным наказам дэлегатам V Усебеларускага сходу, якіх папрасілі прыняць экстранныя меры па завяршэнні даўгабуда-аб’екта «Беларуска-расійскі ўніверсітэт. Вучэбна-лабараторны корпус са спарткомплексам па вул. Ленінскай».

«Мы звярталіся і да прэзідэнта, і да старшыні НАК РБ, ва ўрад, Магаблвыканкам, прапаноўвалі правесці суботнік для накіравання сродкаў на завяршэнне амаль гатовага да здачы аб’екта. Але вышэйпазначаныя патрыёты і заступнікі выхавання моладзі замест прыняцця мер па сутнасці, прынялі рашэнне аб кансервацыі аб’екта і забаўляюцца адпіскамі «па крузе», – сказана ў тэксце наказу. – «Затое для сваіх забавак  мясцовая эліта выдаткавала сродкі на гольф і лыжную базу пад Чавусамі», – адзначаюць падпісанты.

Яны патрабуюць ад дэлегатаў вынесці гэтае пытанне на Усебеларускі сход і прыняць меры па сутнасці, завяршыўшы будаўніцтва да 1 верасня 2016 года.

V Усебеларускі сход адбудзецца ў Мінску ў 22-23 чэрвеня.

Будаўнічыя работы па новаму корпусу БРУ пачаліся яшчэ ў 1993 г. Тады ўмацавалі Дзябранскі яр і часткова ўзвялі сцены падвала 9-павярховага будынка. У сярэдзіне 90-х гг. работы былі прыпыненыя і аднавіліся толькі ў траўні 2009 г. Быў заглыблены катлаван і падведзены інжынерныя сеткі. З тых часоў праца ідзе вельмі марудна і да гэтага часу корпус навучальнай установы вельмі далёкі ад свайго канчатковага выгляду.

Каментар

Ваш e-mail не будзе апублікаваны ( required )

УКантакце

Facebook

Архіў