Следчы камітэт адмовіўся спыняць крымінальную справу супраць Станіслава Паўлінковіча

Адвакат падазраванага ў распаўсюдзе парнаграфіі актывіста сцвярджае, што скончыліся тэрміны прыцягнення да адказнасці.

28 верасня. Алесь Святліцкі. Магілёў


Следчы Ганна Бяляева паведаміла апазіцыйнаму актывісту Станіславу Паўлінковічу, якога падазраюць у распаўсюдзе парнаграфічных матэрыялаў 6 гадоў таму, што крымінальная справа ў дачыненні да яго спынена не будзе.

Раней Паўлінковіч накіроўваў хадайніцтва ў пракуратуру з просьбай спыніць крымінальны пераслед з прычыны заканчэння тэрміну даўнасці для прыцягнення да адказнасці.

– Згодна са словамі майго адваката, тэрмін скончыўся яшчэ ў 2016 годзе, то бок справу супраць мяне не мелі права нават пачынаць, – распавёў актывіст.

Пракуратура перанакіравала дакумент ў Следчы камітэт. Следчы Ганна Бяляева ў сваім адказе паведаміла, што «злачынства ў форме захоўвання [парнаграфіі] падоўжанае і лічыцца юрыдычна скончаным з моманту завяршэння названых дзеянняў».

Станіслаў Паўлінковіч не згодны з такой фармулёўкай і асцерагаецца правакацый:

– Я лічу, што супраць мяне была сфабрыкаваная крымінальная справа ў «распаўсюдзе парнаграфіі», груба парушана заканадаўства. Пры гэтым канфіскаваную яшчэ напачатку сакавіка тэхніку мне дагэтуль не вярнулі. Я не ведаю, што яны яшчэ туды запампуюць, я больш чым дапускаю гэта. А там глядзіш – і новая невялікая справа. Мабыць, вырашылі трымаць мяне “на кручку”, каб я спыніў сваю апазіцыйную дзейнасць і з’ехаў з краіны. Аднак я не здамся, – заявіў Паўлінковіч.

Праверка ў дачыненні да Станіслава Паўлінковіча па факце распаўсюджвання парнаграфічных матэрыялаў 6 гадоў таму доўжылася з сакавіка гэтага года. У жніўні была ўзбуджаная крымінальная справа. Хутка актывіста арыштавалі для прад’яўлення абвінавачвання, але паўнавартасных доказаў віны Павлинковича у міліцыі не знайшлося і яго адпусцілі.

Таксама ён быў аштрафаваны на 460 рублёў штрафу за ўдзел у «Акцыі папярэджання» ў Менску 8 верасня.

Каментар

Ваш e-mail не будзе апублікаваны ( required )

УКантакце

Facebook

Архіў