Пракуратура ў абыход рашэння суда сказала міліцыі спыніць справу ў дачыненні да чыноўніка

Журналіст Уладзімір Лапцэвіч дагэтуль спрабуе прыцягнуць да адказнасці супрацоўніка Адміністрацыі Ленінскага раёна Канстанціна Кісцянёва.

11 жніўня. Магілёў. Алесь Святліцкі


29 красавіка ў будынку Адміністрацыі Ленінскага раёна Магілёва адбыўся сход членаў гаражнага кааператыва “Спадарожнік-2008”. Члены кааператыва запрасілі для асвятлення мерапрыемства журналіста БелаПАН Уладзіміра Лапцэвіча, аднак прадстаўнік раённай улады Канстанцін Кісцянёў адмовіўся пусціць карэспандэнта ў залу. Журналіст напісаў скаргу ў Ленінскі РАУС, у якой папрасіў прыцягнуць чыноўніка да адміністрацыйнай адказнасці. Участковы Емяльяненка пастанавіў спыніць вытворчасць за адсутнасцю складу правапарушэння, аднак суд адмяніў пастанову і адправіў справу на новы разгляд.

Аднак і ў другі раз міліцыя не знайшла слядоў парушэнні. Лапцэвіч яшчэ раз абскардзіў пастанову аб спыненні справы ў судзе, і выйграў. Ён даказаў, што ўчастковы Аляксандр Шмаянкоў не апытваў яго, як гэта было пазначана ў рапарце.

Выкрыўшы хлусню міліцыянта, Уладзімір Лапцэвіч звярнуўся ў гарадскую пракуратуру з просьбай даць прававую ацэнку дзеянням Шмаянкова.

Гарадская пракуратура прызнала памылкі, дапушчаныя участковым і вынесла яму афіцыйнае папярэджанне. Але гэта аказалася не ўсё.

Намеснік пракурора Магілёва Аляксандр Каранькоў паведаміў журналісту, што даў пісьмовае ўказанне кіраўніцтву Ленінскага РАУС, каб справу ў дачыненні да чыноўніка Канстанціна Кісцянёва спынілі з-за сыйшоўшых тэрмінаў.

– Атрымліваецца, што суд накіраваў справу на новы разгляд, а пракуратура, у сваю чаргу, загадвае справу спыніць. Пракуратура не можа гэтага зрабіць, яна можа вынесці пратэст на рашэнне суда і тады павінен быць яшчэ адзін новы суд. Больш за тое, ніякія тэрміны яшчэ не скончыліся, – распавёў Лапцэвіч.

Па КаАП, адміністрацыйнае спагнанне можа быць накладзена не пазней за два месяцы са дня здзяйснення правапарушэння. У гэтым жа Кодэксе пазначаны момант, які, як лічыць карэспандэнт БелаПАН, намеснік пракурора праігнараваў.

– У КаАП выразна сказана, што ў выпадку адмены або страты сілы пастановы па справе аб адміністратыўным правапарушэнні, пры новым разглядзе спагнанне можа быць накладзена не пазней за два месяцы з дня адмены пастановы. Гэта значыць адміністрацыйнае спагнанне на Кісцянёва могуць накласці па законе да 28 верасня, – выказаў свой пункт гледжання Уладзімір Лапцэвіч.

Пастанову намеснік пракурора Каранькова журналіст абскарджвае ў абласной пракуратуры.

Каментар

Ваш e-mail не будзе апублікаваны ( required )

УКантакце

Facebook

Архіў