МУС адмовілася распавядаць пра наступствы праверкі ў дачыненні да сына прэзідэнта

Хто і якое пакаранне панёс за тое, што 12-гадовы Мікалай Лукашэнка кіраваў камбайнам, так і засталося невядомым.

9 лістапада. Магілёў. Ігар Лазоўскі


20 жніўня Аляксандр Хамратаў   звярнуўся   у МУС з просьбай устанавіць асобу, якая перадала кіраванне збожжаўборачным камбайнам 12-гадоваму хлопчыку, а таксама правесці праверку па факце адсутнасці ў Мікалая Лукашэнкі правоў на кіраванне транспартным сродкам.

Начальнік ДАІ МУС Дзмітрый Казюк у адказ на гэта паведаміў, што «звароты атрыманы і па іх прынятыя рашэнні ў парадку Працэсуальна-выканаўчага кодэкса аб адміністрацыйных правапарушэннях». Што гэта за рашэнні і кім яны былі прынятыя, кіраўнік дзяржаўтаінспекцыі не пазначыў.

Хамратаў вырашыў высветліць гэтае пытанне і адправіў яшчэ адзін зварот у Міністэрства ўнутраных спраў. У паўторным адказе Дзмітрый Казюк паведаміў, што распавядаць пра рашэнне ў дачыненні да Мікалая Лукашэнкі і яго бацькоў няма ніякіх падставаў:

«У адпаведнасці з нормамі Працэсуальна-выканаўчага кодэкса аб адміністрацыйных правапарушэннях орган, які вядзе адміністрацыйны працэс, не мае прававых падстаў паведамляць заяўніку інфармацыю аб прынятым па справе рашэнні, бо вы не з’яўляецеся удзельнікам адміністрацыйнага працэсу», – заявіў Казюк.

Аляксандр Хамратаў такі адказ лічыць доказам асаблівага стаўлення сілавікоў да вышэйшай дзяржаўнай улады:

– На жаль, там, дзе «сямейства», закон не працуе, – пракаментаваў адказ МУС праваабаронца.

Каментар

Ваш e-mail не будзе апублікаваны ( required )

УКантакце

Facebook

Архіў