Магілёўскі КДБ цікавіцца наведвальнікамі сайта тактычнай групы “Беларусь”

Як стала вядома mspring.online, як мінімум адзін магілёвец трапіў пад нефармальны допыт камітэта дзяржбяспекі за тое, што заходзіў на старонку ТГБ.

Допыт адбыўся яшчэ на мінулым тыдні. У мэтах бяспекі наша крыніца папрасіла не выдаваць ягонае імя і канкрэтную дату, калі адбылася сустрэча з супрацоўнікамі КДБ. Пры гэтым ён прадставіў у рэдакцыю нумар тэлефона, з якога яму тэлефанаваў прадстаўнік сілавога ведамства.

– Спачатку патэлефанавалі па мабільным тэлефоне, прапанавалі сустрэцца. Я быў на працы, сказаў, каб даслалі позву, калі хочуць са мной сустрэцца. Праз нейкі час яны датэлефанаваліся да дырэктара, пасля чаго дырэктар сказаў, што ён будзе не супраць, калі я з’езджу.

Паводле словаў крыніцы, супрацоўнікі вялі сябе з ім карэктна. Фармат размовы яны пазначылі як «прафілактычную гутарку».

– Яны пыталіся, чым я займаюся, ці збіраюся ехаць ваяваць на Украіну, навошта заходзіў на старонку «Тактычнай групы Беларусь». Пры гэтым паскардзіліся, што заданне спусцілі зверху. Наколькі я зразумеў, у КДБ прабіваюць IP-адрасы, размешчаныя ў Беларусі, з якіх заходзілі на сайт.

Крыніца адзначыла, што супрацоўнікі дзяржбяспекі некалькі разоў далі зразумець, што яны выдатна дасведчаныя, што адбываецца ў яго сям’і. Аднак прамых пагроз ад іх не паступала.

– Дапускаю, што ў дадзены момант ідзе адпрацоўка тых, хто заходзіў на гэтую старонку. Прычым, як я зразумеў, спачатку праца вялася ў Мінску, а цяпер загад паступіў ва ўсе рэгіянальныя ўпраўленні КДБ, – сказаў на заканчэнне наш суразмоўца.

ДАВЕДКА: Тактычная група «Беларусь» – узброенае фарміраванне добраахвотнікаў з Беларусі, якія ваююць на Данбасе на баку Ўкраіны. Створана вясной 2015 года. Сваёй галоўнай мэтай група бачыць “сумесную барацьбу за незалежнасць Украіны, таму што вораг наш агульны – маскоўская імперыя, і лінія фронту зараз праходзіць тут”.

Каментар

Ваш e-mail не будзе апублікаваны ( required )

УКантакце

Facebook

Архіў