“Мы ехалі ў суд на асабістым аўто намесніка начальніка РАУС, ён увесь час казаў камусьці па тэлефоне, куды мы накіроўваемся”

Каардынатар магілёўскіх “Маршаў недармаедаў” Уладзімір Шанцаў выйшаў на волю.

29 сакавіка. Магілёў. Офіс АГП, Ленінская, 29. Ігар Лазоўскі. На здымке – Уладзіміра Шанцава забіраюць на цывільнай машыне ў ІЧУ пасля суда 14 сакавіка.


Уладзіміра Шанцава вызвалілі а 14 гадзіне 29 сакавіка разам з яго калегам з БХД Алегам Аксёнавым. Каля ІЧУ палітыкаў сустракалі прадстаўнікі дэмакратычнай супольнасці, журналісты і праваабаронцы. Увечары пасля вызвалення старшыня абласной арганізацыі АГП распавёў журналістам і паплечнікам падрабязнасці свайго затрымання і падзяліўся планамі на будучыню.

– Я прыехаў 14 сакавіка ў Ленінскі РАУС да маёра Слаўнікава. Ён адразу мне сказаў, што я затрыманы. Павезлі ў ІЧУ. Гадзін у 8 вечара змясцілі ў камеру. Самае хрэновае, што там пастаянна гарыць святло і спаць немагчыма. Раніцай мяне падпалкоўнік Калацілкін разам з нейкім маёрам прывезлі ў суд на асабістай машыне. Як я зразумеў, гэта было яшчэ да яго адкрыцця. Прычым увесь час, колькі мы ехалі, Калацілкін пастаянна камусьці тэлефанаваў і дакладваў аб нашым месцазнаходжанні і кірунку. У судзе хутка прыбегла задыханая суддзя з сакратаром. Амаль адразу пачаўся працэс, яны вельмі спяшаліся. Я спыніў яе, сказаў, што адміністрацыйны працэс адкрыты і таму я хачу, каб прысутнічалі гледачы, журналісты. Яна сказала, што гэта ўсё потым, пасля гэтага я адмовіўся ад дачы паказанняў. У справе было поўна здымкаў з акцыі. Мяне яна асабліва не слухала, чытала ўсё хутка нібы спрабавала хутчэй ад мяне пазбавіцца, – распавёў Шанцаў. – Ну, а потым вы ведаеце. Далі 15 сутак, спрабавалі ціха вывесці мяне з будынку суда, але журналісты заўважылі і я паспеў ім сёе-тое сказаць.

Палітык заявіў, што адміністрацыйны арышт не змяніў яго рашучасці дамагацца адмены Дэкрэта №3 і паляпшэнняў сацыяльна-эканамічнай сітуацыі. Аднак ужо без мітынгаў і маршаў:

– У сувязі з тым, што пачаліся жудасныя рэпрэсіі, трэба знайсці іншы фармат працы з людзьмі. У тым ліку і праз выбары ў мясцовыя саветы, якія пройдуць недзе праз паўгода. Народу трэба даць альтэрнатыву. Калі умоўны Марзалюк атрымае 3%, а не 15%, насельніцтва зразумее, што такім людзям нельга больш быць ва ўладзе, – лічыць Уладзімір Шанцаў.

Ад вулічнай актыўнасці палітык пакуль хоча адмовіцца:

– Насельніцтва запалохана. Заклікаць да акцый пратэсту цяпер няма сэнсу.

Па словах старшыні абласной арганізацыі АГП, цяпер ён і яго паплечнікі засяродзяцца на іншых формах работы. У прыватнасці, яны збіраюцца дамагчыся адклікання дэпутата Аляксандра Старавойтава з Палаты прадстаўнікоў:

Мы планавалі акцыямі 15 і 25 сакавіка запусціць хвалю народнага абурэння, пасля якога старшыня гарсавета не змог бы адмовіць людзям у скліканні сходу, дзе мы б разгледзелі пытанне аб адклiканнi дэпутата. Аднак жудасныя рэпрэсіі зблыталі ўсе карты.

Каментар

Ваш e-mail не будзе апублікаваны ( required )

УКантакце

Facebook

Архіў