Суддзя Ленінскага раёна Ігар Шведаў пастанавіў пачаць новую праверку па адміністратыўнай справе ў дачыненні да дэпутата.

25 чэрвеня. Магілёў. Ігар Лазоўскі


6 траўня 2019 года дэпутат Палаты прадстаўнікоў Ігар Марзалюк, гендырэктар ЗАТ «ЦІС-Магмет» Валер Гусарэвіч і некалькі чалавек сталага ўзросту ўрачыста адкрылі парэнчы ў парку ў раёне вуліцы 30-ці гадоў Перамогі. Атрымалася рэзанансна – Марзалюк і Гусарэвіч нават перарэзалі чырвоную стужку, пасля чаго сталі мемам Байнэта.

В Могилеве власти торжественно открыли… перила. С перерезанием красной ленточки ФОТОФАКТ

Актывіст Аляксандр Хамратаў звярнуў увагу, што падчас мерапрыемства адсутнічалі супрацоўнікі міліцыі, хуткай дапамогі і МНС. Ён звярнуўся ў Ленінскі РАУС з просьбай правесці праверку ў дачыненні да дэпутата Ігара Марзалюка і пачаць адміністрацыйны працэс за парушэнне заканадаўства аб масавых мерапрыемствах.

Міліцыя адмовілася пачынаць працэс, спаслаўшыся на адсутнасць складу адміністрацыйнага правапарушэння.

Помните, как Марзалюк торжественно открывал перила? Активист пожаловался, что депутат нарушил закон о массовых мероприятиях

Хамратаў не пагадзіўся з пастановай Ленінскага РАУС і абскардзіў яе ў судзе Ленінскага раёна Магілёва. Суддзя Ігар Шведаў пацвердзіў, што міліцыя аказалася няправай.

«Артыкул 23.34 КаАП РБ (Парушэньне парадку арганізацыі або правядзення масавых мерапрыемстваў) складаецца з пяці частак. Аднак у пастанове [Ленінскага РАУС] аб спыненні справы аб адміністрацыйным правапарушэнні не пазначаная частка артыкула, якая прадугледжвае адказнасць за дадзенае правапарушэнне», – патлумачыў у пастанове суда Шведаў.

Суддзя таксама звярнуў увагу, што не ўстаноўлены статус мерапрыемства, падчас якога Марзалюк ўрачыста адкрыў парэнчы.

«Гэта не дазваляе зрабіць законны і абгрунтаваны вывад аб наяўнасці або адсутнасці прыкмет адміністрацыйнага парушэння», – заявіў суддзя Ленінскага раёна.

Ігар Шведаў адмяніў рашэнне Ленінскага РАУС і пастанавіў накіраваць матэрыялы праверкі ў дачыненні да Ігара Марзалюка на новы разгляд.

Аляксандр Хамратаў толькі часткова задаволены рашэннем:

– Вядома, добра, што суд звярнуў увагу на нестыкоўкі ў матэрыялах справы. Але праблема ў тым, што 6 ліпеня заканчваецца тэрмін прыцягнення дэпутата Ігара Марзалюка да адміністрацыйнай адказнасці. Я на сто адсоткаў упэўнены, што міліцыя зробіць усё, каб тэрмін мінуў, – пракаментаваў сітуацыю актывіст.