Магілёўская трыумфальная арка, якую будуюць на ўскраіне горада, каштуе амаль 2 млн. даляраў?


СОЦЫУМ / Thursday, May 24th, 2018

Улады просяць скінуцца на яе яшчэ. Нейкі спецыфічны трыумф.

24 мая. Магілёў. Ігар Лазоўскі


Нашаму сайту стаў вядомы дакладны кошт будаўніцтва трыумфальнай аркі на ўездзе ў Магілёў. Згодна з ананімнай крыніцай ў гарвыканкаме, гаворка ідзе пра суму амаль у 4 млн. рублёў.

Цалкам праект носіць назву «Добраўпарадкаванне кальцавога перасячэння на ПК151 – узвядзенне аркі з падземным пераходам. Арка аб’ект №17.17». Заказчыкам выступае Упраўленне камунальнага будаўніцтва г. Магілёва.

Кошт на дату пачатку распрацоўкі каштарыснай дакументацыі складаў спачатку 4 212 976 рублёў, пазней быў зменшаны да 3 849 121 рублі. Такім чынам, арка абыйдзецца магілёўцам амаль у 2 мільёны даляраў.

У ліпені 2017 года, калі будаўніцтва пачалося, «Магілёўскія ведамасці» распавялі, што толькі на надземную частку пойдзе «каля 500 тысяч рублёў». Згодна з газетай, частку гэтых сродкаў планавалася сабраць з магілёўцаў.

Але ў красавіку 2018 гады іншая газета – «Веснік Магілёва» – распавяла, што будаўніцтва будзе ажыццяўляцца «выключна за кошт ахвяраванняў гараджан, добраахвотнага ўдзелу неабыякавых, у тым ліку магілёўскіх і ня магілёўскіх прадпрыемстваў і арганізацый». Дырэктар Упраўлення капітальным будаўніцтвам г. Магілёва Андрэй Маскалёў пахваліўся, што асабіста ахвяраваў 100 рублёў, а ўсяго яго арганізацыя аддала 10 тысяч рублёў на будаўніцтва аб’екта.

23 мая ў сацыяльных сетках з’явілася інфармацыя, што магілёўскі гарвыканкам просіць арганізацыі горада «разгледзець магчымасць аказання спонсарскай дапамогі на будаўніцтва аркі на Мінскай шашы». Даручэнне даў асабіста старшыня гарвыканкама Уладзімір Цумараў.

Могилев.Real

Пазіцыя ўладаў ў тым, што «арка стане падарункам г. Магілёву ад магілёўцаў, а таксама палепшыць знешняе аблічча абласнога цэнтра з улікам правядзення ў 2018 годзе V Форуму рэгіёнаў Беларусі і Расіі“. Нагадаем, што на гэтае мерапрыемства прэзідэнт Аляксандр Лукашэнка паклікаў расійскага калегу Уладзіміра Пуціна.

Leave a Reply

Your email address will not be published. Required fields are marked *