Нядаўна ў Магілёве з’явілася першая вулічная кніжная шафа. Што з ёй зараз?


СОЦЫУМ / Thursday, August 2nd, 2018

Два тыдні на магілёўскай вуліцы зменяць каго заўгодна.

2 жніўня. Магілёў. Алесь Святліцкі


Два тыдні таму выпускнікі школы актывізму “Цяпліца” Цэнтра гарадскіх ініцыятыў адкрылі першую ў горадзе публічную кніжную шафу. Яе мэта ў тым, каб палегчыць абмен літаратурай паміж людзьмі.

«Грамадская кніжная шафа – прыстасаванне для захоўвання патрыманых кніг ў грамадскіх месцах з мэтай прадастаўлення магчымасці ўсім жадаючым узяць адну або некалькі гэтых кніг у бязвыплатнае карыстанне або «абмяняць» на любыя іншыя кнігі па ўласным меркаванні»,- гаварылася ў прэс-рэлізе ЦГІ.

Праз два тыдні шафу ўжо нехта пашкодзіў – цяпер яна перакошана з-за зламанай падставы злева. З-за гэтага не могуць шчыльна зачыніцца створкі шафы. Акрамя гэтага, побач валяецца мноства недакуркаў, а ззаду была прыхавана пустая бутэлечка з-пад піва.

Паводле прэс-рэлізу (гл. загалоўнае фота), побач з шафай таксама павінен быць стол і белы акуратны стул. Але апошні адсутнічае – зараз там стаіць жоўты, пасядзець на якім можна, але, мяркуючы па стану, нядоўга.

З кнігамі ўнутры ўсё ў парадку. Там можна знайсці шмат твораў, але пераважная большасць – гэта любоўныя раманы. Зрэшты, сустракаецца і класіка – Набокаў, сачыненні Казьмы Пруткова, О’Генры.

Знайсці вулічную кніжную шафу можна глыбока ў двары каля д. 28а па вул. Ленінскай.

Leave a Reply

Your email address will not be published. Required fields are marked *