Андрэй Бандарэнка абскардзіў у судзе сваё знаходжанне ў ШІЗА

Суддзя Ленінскага суда Магілёва Юлія Трапыніна стала на бок магілёўскай турмы №4.

28 снежня. Магілёў. Суд Ленінскага раёна. Ігар Лазоўскі


Былы кіраўнік праваабарончай «Платформы Іннавэйшн» Андрэй Бандарэнка разам з адвакатам Вадзімам Мушынскім працягваюць аспрэчваць дысцыплінарныя спагнанні з боку адміністрацыі магілёўскай турмы №4.

28 снежня суддзя Юлія Трапыніна разглядала скаргу Бандарэнкі на дысцыплінарнае спагнанне, якое яму вынеслі 2 чэрвеня гэтага года. На думку кіраўніцтва папраўчай установы, праваабаронца парушыў правілы ўнутранага распарадку. 

25 траўня, калі яго канваіравалі ў камеру пасля прагулкі ва ўнутраным дворыку, ён нібыта уступіў у гутарку з іншым зняволеным, пры гэтым праігнараваўшы заўвагі кантралера. За гэта Андрэя Бандарэнку памясцілі на пяць сутак у штрафны ізалятар.

Бандарэнка ў сваёй скарзе адзначыў, што спагнанне было неправамерным. Праваабаронца не прызнаў сам факт размовы з іншым зняволеным, а таксама заявіў, што кантралёр не рабіў яму ніякіх заўваг 25 траўня. Ён запэўніў суд, што заўсёды стараецца выконваць правілы ўнутранага распарадку.

Магілёўская турма са свайго боку папрасіла адмовіць у задавальненні скаргі, паколькі Бандарэнка ўпусціў тэрмін абскарджання ў судзе. Адвакат Вадзім Мушынскі ў адказ на гэта паведаміў, што пропуск тэрміна звязаны са зваротам у органы пракуратуры – спачатку гарадскую, потым Генеральную.

Юлія Трапыніна палічыла гэтыя довады недастатковымі.

– Тэрмін на абскарджанне дысцыплінарнага спагнання быў прапушчаны без паважных на тое прычын, – паведаміла суддзя. Яна не задаволіла скаргу Андрэя Бандарэнкі.

Усяго на праваабаронцу ўскладзена больш за дзесятак спагнанняў з боку розных месцаў пазбаўлення волі, дзе ён адбываў тэрмін. З-за гэтага былы кіраўнік праваабарончай «Платформы Іннавэйшн» прызнаны злосным парушальнікам рэжыму. У дачыненні да яго распачата справа за злоснае непадпарадкаванне патрабаванням адміністрацыі папраўчай установы. Калі яго прызнаюць вінаватым, яму пагражае да двух гадоў зьняволеньня. Цяперашні тэрмін Бандарэнкі заканчваецца 31 сакавіка 2017 года.

Каментар

Ваш e-mail не будзе апублікаваны ( required )

УКантакце

Facebook

Архіў