Пра гэта яму паведаміў начальнік Кастрычніцкага РАУС.

10 снежня. Магілёў. Ігар Лазоўскі


Палкоўнік Аляксандр Сільвановіч праінфармаваў праваабаронцу і журналіста Аляксандра Буракова, што праверка ў рамках крымінальна-працэсуальнага кодэкса ў дачыненні да яго прыпыненая.

На журналіста mspring.online з Магілёва хочуць завесьці крымінальную справу. З-за сувязяў з праваабарончым цэнтрам “Вясна”

8 лістапада аперўпаўнаважаны аддзела па барацьбе з эканамічнымі злачынствамі Кастрычніцкага РАУС, старшы лейтэнант Павел Кот паведаміў Буракову, што ў дачыненні да яго могуць распачаць крымінальную справу за дзейнасць ад імя незарэгістраванай арганізацыі – праваабарончага цэнтру «Вясна».

Праверка была распачата 8 кастрычніка з-за таго, што журналіст публікуе свае матэрыялы на сайце аб правах чалавека mspring.online. Паколькі сайт з’яўляецца рэгіянальным інфармацыйным рэсурсам ПЦ “Вясна”, Буракоў, на думку міліцыянта, парушыў і працягвае парушаць артыкул 193.1 Крымінальнага кодэкса.

Падчас праверкі Кот узяў тлумачэнні ў трох чалавек, якія пацвердзілі, што Буракоў гутарыў з імі падчас падрыхтоўкі артыкулаў для сайта.

Каб высветліць, на якім этапе знаходзіцца праверка, Буракоў 21 лістапада звярнуўся з заявай у Кастрычніцкі РАУС.

9 снежня ён атрымаў адказ ад імя начальніка райаддзела Аляксандра Сільвановіча. Журналісту паведамілі, што яго заява таксама далучана да матэрыялаў праверкі, але сама яна прыпыненая.

– Мяркуючы па тым, што пазначана ў адказе Сільвановіча, праверку прыпынілі з-за неатрымання вынікаў нейкай экспертызы, што выглядае смешна. Улічваючы, што я не хаваю сувязь з «Вясной», распачаць крымінальную справу па «193.1» у маім выпадку лёгка. Іншая справа, што ўладзе зняволеныя або аштрафаваныя па гэтым артыкуле ў гэты перыяд часу вельмі невыгодныя, – пракаментаваў адказ Буракоў.

Пры гэтым ён звярнуў увагу на той факт, што праверка менавіта прыпыненая, а не спыненая:

– Гэта досыць зручны спосаб для сілавікоў трымаць не зусім прыемных для іх людзей на кручку, нічога дзіўнага. Але ж нічога страшнага тут няма. Я ўпэўнены, што я нічога супрацьпраўнага не раблю.

Leave a Reply

Your email address will not be published. Required fields are marked *