АГП праз суд патрабуе ад магілёўскіх уладаў спыніць будаўніцтва трыумфальнай аркі


СОЦЫУМ, Суд, УЛАДА / Tuesday, October 3rd, 2017

Старшыня абласной арганізацыі АГП Уладзімір Шанцаў ў судовым парадку дамагаецца таго, каб гарвыканкам выканаў волю шасці з паловай тысяч магілёўцаў.

3 кастрычніка. Магілёў. Ігар Лазоўскі


У 2015 годзе гурт магілёўскіх актывістаў сабрала больш за 6,5 тысяч подпісаў за ачыстку Святога возера. Улады тады адмовілі, спаслаўшыся на адсутнасць грошай у бюджэце. Ачыстка вадаёма, згодна з планам на 2010 год, павінна была абыйсціся ў 30 мільярдаў рублёў на той момант.

У чэрвені 2017 года абласная арганізацыя АГП вырашыла яшчэ раз падняць пытанне і накіравала калектыўны зварот на імя старшыні гарвыканкама з патрабаваннем выканаць волю 6,5 тысячы магілёўцаў.

Аднак гарвыканкам ізноў спаслаўся на недахоп фінансаў. Адказ гарадскіх уладаў Уладзімір Шанцаў абскардзіў у аблвыканкаме, аднак поспеху не дамогся.

– Яны толькі напісалі, што Магілёўскаму гарвыканкаму даручана актывізаваць працу па рашэнні пытання экалагічнага стану Святога возера. Гэта нельга лічыць адказам па сутнасці, – лічыць кіраўнік рэгіянальнай арганізацыі АГП.

Ён вырашыў судзіцца з уладамі, каб дамагчыся ачысткі возера. У скарзе, якую Уладзімір Шанцаў накіраваў у суд Ленінскага раёна горада, ён падкрэслівае, што “шэсць з паловай тысяч подпісаў, сабраныя пад зваротам да ўладаў па рашэнні мясцовай праблемы, – гэта далёка не шэраговы выпадак наогул для ўсёй краіны. Такая колькасць подпісаў грамадзян не збіралася практычна ніколі. У дадзеным выпадку гаворка ідзе пра праблему ўсіх гараджан. І шэсць з паловай тысяч подпісаў гэта даручэнне жыхароў горада гарвыканкаму, якое трэба было пачаць неадкладна выконваць.

Замест гэтага, на думку Шанцава, чыноўнікі актыўна прыняліся будаваць трыўмфальную арку на ўездзе ў Магілёў, апраўдваючы гэта тым, што гэты аб’ект быў прадстаўлены прэзідэнту Аляксандру Лукашэнке падчас яго працоўнага візіту ў Магілёўскую вобласць.

Арка патрэбна наогул у самую апошнюю чаргу. Грошы для глупстваў ёсць, а на першачарговыя патрэбы магілёўцаў іх няма, рэзюмуе палітык.

Ён папрасіў суд абавязаць гарвыканкам выканаць даручэнне 6,5 тысячы магілёўцаў, а таксама спыніць будаўніцтва трыумфальнай аркі. Грошы, якія пры гэтым вызваляцца, Шанцаў патрабуе накіраваць на ачыстку Святога возера.

One Reply to “АГП праз суд патрабуе ад магілёўскіх уладаў спыніць будаўніцтва трыумфальнай аркі”

Leave a Reply

Your email address will not be published. Required fields are marked *